हिटलरले प्रयोग गर्ने गरेको
निजी रिभल्भर प्राप्त भयो भने
खुसीले पागत हुनेछन्
क्युरियोका धनाढ्य संकलकहरु
फराओनको राजछत्र,
सिकन्दरको घोडाको खुट्टाको नाल,
सुन्दरी क्लियोपाट्राका गहनाहरु,
चङ्गेज खाँको खुनी तरबार,
निरोले बजाउने गरेको बाँसुरी
र प्रथम पोपकालीन पोसाकहरु
यी सबै जम्मा गर्नुपर्ने
अप्राप्य चीजबीजहरु हुन्
जसको खोज गरिँदैछ
मरलिन मुनरोको ब्रेसियरको पनि
ठूलो माग छ
चन्द्रमामा पहिलो पटक पठाइएको
कुकुर लाइकाको रौं
सरलक होम्स सिरिज जासुसी उपन्यासका
मौलिक पाण्डुलिपिहरु
प्राचीन डाइनोसरका जीवाश्म पनि
कम महत्वपूर्ण छैनन्
प्रिन्सेज डायनाका गुप्त प्रेमपत्रहरु
जोन केनेडीकी श्रीमतीले
विवाहका बखत लगाएको स्यान्डल
हेनरी फोर्डले आफ्नो युवावस्थामा
चढ्ने गरेको गाडी
आदि–इत्यादि
आफ्नो संकलनमा राख्न नपाएर
खिन्न छन्
विश्वप्रसिद्ध क्युरियोका संकलकहरु
संसारमा संकलन गर्नुपर्ने सामग्रीहरु
अनन्त छन्
पचास वर्षपछि
जर्ज बुसको हाड,
गोर्बाचेभका बङ्गाराहरु
र मार्गरेट थ्याचरका
पालिस गरिएका नङ्ग्राहरु
सबै क्युरियोका पदार्थ
भइसकेका हुनेछन्
(२०४८)