मित्र पाठक – ज…द.. (लघुकथा )
बाटोमा पुरानो साइकल डोराउदै हिड्दै थिए अचानक राति कारको टि-टिट हर्नले झस्किएँ । गाडी तर्फ फर्केर हेरें मलेसियामा सँगै काम गरेको साथी आफैं कार चलाएर हिंडेको । उसलाई देख्नासाथ मैले भनिहालें – “मलेसिया जान छाडेर यहीं कार चलाउन थालेको ?”
उसले अल्लि अफ्ठ्यारो मान्दै भन्यो- “हैन आफ्नै हो । ”
मैले थपेँ- “तेरो जोक गर्ने पुरानो बानी अझै उस्तै छ है..।”
उसले मलाई विश्वास दिलाउन सकेन । र, “ल ल फेरि भेटेर कुरा गरौंला” भन्दै अगाडी बढ्यो ।
सुरुदेखिनै हाम्रो कुरा सुनिराखेको एउटा मान्छे मेरो नजिकै आयो र भन्यो- “उसले ठिकै भन्यो त । त्यो कार उसको आफ्नै हो । अहिले त ऊ यो एरियाको चिनिएको ज.. ..द हो त ! कार चढ्नु के ठुलो कुरा भो र! उसले त करोड कमाई सक्यो ।”
मैले आत्तिएर सोधें- “के हो यो ज.. ..द भनेको ?”
“जग्गा दलाल,” उक्त मान्छे पनि यति भन्यो र आफ्नो बाटो लाग्यो ।
म पनि सबै कुरा बुझें अनि थोत्रो साइकल डोर्याउँदै लागें आफ्नो गन्तब्यतिर…….।