सुरेन उप्रेती – ढाँट्यौ तिमीले
पटक पटक ढाँट्यौ तिमीले पत्याउँदै बस्यौं
पकाएको तिमीलई दिइ हामीले पेट कस्यौं
भोली घाँम लाग्छ भन्दै लग्यौ हाम्रो बर्को
नेता भयौ चिन्न छोड्यौ गर्छौ झर्को फर्को
संसारमा दुई जाति छन् पुरुष नारी भन्थ्यौ
शोषित शाषित दुई बर्ग छन् सँधै भन्ने गर्थ्यौ
अहिले आइ धेरै जाति थुप्रै बर्ग ल्यायौ
कसले दियो तिमीलाई महल के श्रम गर्दा पायौ
धर्म कर्म नाम लिँदै राज्य चाहियो भन्छौ
मन्दिरका मूर्ति बेच्दै दिनमा पैसा गन्छौ
रातभरी नशा भित्र दिंउशो देशको चित्र
कस्तो राज्य बन्ने होला मलाई पोल्छ भित्र
नामले विकाश हुने भए सिंगापुर राख
अर्को राख स्विजर्लयाण्ड नर्वे लण्डन राख
अमेरिका क्यानडा अष्टे्लिया नै राख
सबै भन्दा ठूलो कुरा महान सोच राख
वन्धुवान्धव लड्न छोडी विकाशमा लागौं
मानवता हो ठूलो धर्म हत्या हिंसा त्यागौ
सबै जनाले काम गरे देशै बन्छ श्वर्ग
आफैं भाग्छ भोक रोग हट्छन् सबै बर्ग ।।