Tag: Sahityakar R R Chaulagain Ka Nepali Katha Haru

आर आर चौलागाईं – गफाडी शिर्षक (नेपाली लघु कथा)

मैले प्रवेशिका दिनेबेलाको कुरा हो। हामी अखिलेश नाम गरेका शिक्षककहाँ ट्युसन पढ्थ्यौँ। पढाइबाहेक कहिलेकाहीँ अनौपचारिक गफ पनि हुन्थ्यो त्यहाँ। अखिलेश सर निकै गफ हाँक्नुहुन्थ्यो। वहाँका कतिपय कुरा त पत्याउन पनि मुस्किल पर्थ्यो। तैपनि हामी चाख मानेर सुन्थ्यौँ।

एकदिन सरले आफ्नो विगतलाई कोट्याउनुभो। वहाँले निकै फूर्तिसाथ भन्नुभो- ‘म कहाँकहाँ कति घुमेँ सुन्छौ ?’

हामीले एकै स्वरमा सहमति जनायौँ। सर धाराप्रवाह बोल्न थाल्नुभो – ‘मैले झापामा दस वर्ष पढाएँ। विराटनगरमा पाँच वर्ष पढाएँ। अझ पोखरा र काठमाडौँमा त झन् बाह्रबाह्र वर्ष पढाएँ…।’

मैले सरलाई बीचमै फ्याट्ट सोधेँ – ‘अनि सरको उमेरचाहिँ कति भयो होला अहिले ?’

सरले दाह्री सुमसुम्याउँदै निर्धक्कसित भन्नुभो- ‘कति हुनु नि ! भर्खर एकतीस लागेँ।’