मनिता लिम्बु – भावशुन्य
न छ रीस न त छ आरीस
न छ दुःख न त छ कुनै चिन्ता
थाहा छैन कुन्नि किन
आजकल भावना त शुन्य छ…
न दुख्छ चोटले न लाग्छ बचनबाणले
न छुन्छ हर्षले न त विस्मातले
थाहा छैन कुन्नि किन
आजकल चेतना त शुन्य छ…..
न केही पाउन मन छ न गुमाउनुमा पीडा छ
न छ पैसाको भोक न यशको तिर्खा
थाहा छैन कुन्नि किन
आजकल चाहना त न्यून छ……….
न लोभ छ धनको न राग छ यौवनको
न तृष्णा छ जगको न मोह छ मायाको
थाहा छैन कुन्नि किन
आजकल आवश्यकता न्यून छ………