होमशंकर बास्तोला – पुष्टि कसरी गर्ने ? (लघु कथा)
(मधुपर्क २०६७ असार)
विशेष अदालतको अगाडि एउटा एकतले घर भग्नावशेषरूपमा ठडिएको थियो । इजलासमा बसेको समयमा आँखा त्यस घरमा पुग्दा न्यायाधीशका मनमा लाग्दथ्यो – ‘यो घर कसको होला ?’ तर त्यो घर वर्षै दिनमा एकाएक छ तलेमा परिणत भयो । एक वर्ष अगाडि एउटा सरकारी संस्थानको जि.एम.मा नियुक्ति भएका विष्णु सिंहलाई अकूत सम्पत्ति कमाएको भनी अख्तियारले विशेष अदालतमा मुद्दा दायर गरेको थियो । इजलासमा सरकारी वकिल आफ्ना प्रमाण पेश गर्दै बहस गरिरहेको अवसरमा न्यायाधीशले सरकारी वकिललाई प्रश्न गरे-‘ वकिल साप, विष्णु सिंहले भ्रष्टाचार गरेको के प्रमाण छ ?’ अदालत अगाडि रहेको छ तले आकर्षक घर वकिलले देखाउँदै भने ‘ श्रीमान् भ्रष्टाचारको प्रमाण ऊ त्यही छ तले घर हो । ‘ न्यायाधीशले छ तले घरतिर पुलुक्क हेरेर मनमनै सोचे- ‘वर्ष दिन अगाडिको एकतले घर छ तले ! तर कसरी पुष्टि गर्ने ?’
दुवेकोल-७, खोटाङ