दामोदर पुडासैनी किशोर – यो शहरमा
सबै मान्छेहरू
केही न केही सुनाउने लाममा छन्
सुन्न कोही पनि तयार छैन
यो शहरमा
हरेक मान्छेहरू
क्षण क्षणमा कतै न कतै
दौडने सुरसारमा छन्
शहरलाईनै दौडाउँन
कोही सोच्दैन
यो शहरमा
जग्गाको भाउ बढिरहेको
होटल ब्यबसाय चलिरहेको
बजेट पुग्दै नपुगेको
मागको रास र फोहोरको थुप्रो चुलिंदै गएको
ज्यान जोखिममा पर्दै गएको
धूलो ,धुवाँ र बिषादी
असाध्यै बढेको
चर्चा त खुबै छ
बिहानदेखि बेलुकासम्म
तर शहरकै रँग र ढँग बारे
कसैले गर्दैन चर्चा
यो शहरमा
स्कुल र क्याम्पस जाँदाजाँदै
चिठी पत्र तोक आदेश र दर्ता चलानी गर्दा गर्दै
एन जी ओ आइ एन जी ओ का कार्यक्रम चलाउँदा चलाउँदै
बिदेश जाँदा र स्वदेशमै बस्दा
नाच्दा ,गाउँदा र मेलापात गर्दा
बस चढदा ,बिसौनीमा बस्दा ,छोराछोरी डोर्याउँदा
डन पल्टिंदा ,दलाली गर्दा र पाहुर पुहुन्की पुर्याउँदा
अथवा ,नेताका गोजी भरेर कुर्सीमा फनफनी घुम्दा
आँखा र मन साटिन्छ यहाँ कुनै न कुनै मोडमा
दिनभरी कुना कुनामा आफ्नै स्वार्थको पोयो बाट्दै हिँडेपनि
मनको पवित्र मन्दिरमा
सजाउँदैन कसैलेपनि
यो शहरमा
सुन्दर मान्छेको मनमा
जाल ,झेल र षडयन्त्र हुर्काएझैँ
सुन्दर घर ,जग्गा र बन बुट्यानलाई
पापी मनको कुरूसमा
जाली रूमाल बुन्ने
मान्छेहरू धेरै छन्
यो शहरमा
-२०७५ मंसिर १८
मिरर इन होटल ,बसपार्क ,बुटबल