के. आचार्य – त्यसै गर्नु पर्ला
काँढा मिच्न नसकेनी फूल मिच्नु पर्ला
बाठा जित्त्न असम्भव छ लाटै जित्नु पर्ला
काम, क्रोध, लोभ, मोह जन्मैदेखि साथी
यिनैसंग मित्र गांसी जीवन जिउनु पर्ला
मान्छेको बजारमा राम भेटीएन
भेटनै परे आखीरमा रावण बन्नु पर्ला
पुस्तौपुस्ता विति सके यही थोत्रो घरमा
नयाँ घरमा बस्न चाहे सल्काई दिनु पर्ला
उस्ले उल्ले, तैले मैले भन्नै हुन्न यहाँ
भनिएछ कतै भने एक्लो बन्नु पर्ला
यनतेन टिलपिल गर्ने यै छ एउटा दीयो
निभी हाल्यो भने कतै छाम् छुम् गर्नु पर्ला