दियेश रत्न शाक्य – आइफेल टावर र सम्मोहन साम्राज्य
ओ! मोहिनी गजुर
तिमीलाई चुम्न
जब म थाल्छु सिखर यात्रा
स्वागतमा खुल्न थाल्छन्
तिम्रो प्रेमिल मुस्कान
र परिदृश्यमा झुल्किन थाल्छन्
बिहङ्गम पेरिस
र यसको स्वप्निल शान
तिम्रो उचाईबाट नजिकिएको नीलो आकाश
र दूरसम्म देखिने सुन्दर संरचनाहरु
साक्षी राख्दै
म तिमीलाई नियालिरहेको छु
र पाइरहेको छु
बिना कुनै बस्त्रधारण
बिना कुनै रंगको छालाको आवरण
अस्थिपन्जर स्वरुपमै यति बिघ्न खुलेकी
जब तिमीलाई देख्छु
सुन्दरताको परिभाषा फेरिएको पाउँछु
सुगन्धको पहिचान फेरिएको पाउँछु
बसन्तको परिचय फेरिएको पाउँछु
र पाउँछु
नजिकै लुभ्र म्युजियममा
मोनालिसा तिमीलाई नियाल्दै
ताजा मुस्कानमा अडिरहेको
बिशाल सिन नदि तिम्रो छायाँको काउकुतिमै
आफ्नो जवानी रिफ्रेस गरिरहेको
र संगै सजेलिजे चोकको भिक्टोरी गेटमा
नेपोलियन बोनापार्टको शालिक आत्मा
फेरी अर्को महान् बिजयको
महत्त्वाकांक्षा बुन्दै
आफ्नो स्मारकलाई
तिम्रो उचाई जत्तिकै अग्ल्याउने
अवसर खोजिरहेको
साक्षी किनारा बसेर प्रश्न जनाइरहेछन्
सौर्न्दर्य प्रतियोगी बनेर लाममबद्ध
पेरिसका घर,महल र धरोहरहरू
मूलसडक /चोकमा
हरित पुनर्जागरणमा उभिरहेका
हजारौं रुखहरू
क्लासिकल ब्युटीमा खुलेर चम्किरहेका
सडक बत्तीका खम्बाहरू
खुला फेसन परेडमा रमाइरहेका
फुर्तिला नवयौवनाहरू
आखिर कुन साम्राज्य ठूलो छ हँ?
नेपोलियन बोनापार्ट वा आइफेल टावरको
ओ! गगनचुम्बी गजुर
मेरो आँखाबाट
तिम्रो मीठो सम्झना नहटेसम्म
म पनि नापिरहेको हुनेछु
तिम्रो सम्मोहन साम्राज्यको क्षेत्रफल
(कौशिकीमा प्रकाशित)