Tag: geet

दामोदर पुडासैनी किशोर – चियाबारीको गीत

म जन्मेकै तिम्रो लागि हो
मेरा हरेक पात पातले तिमीलाई कुरिरहेछन्
हरेक हाँगा हाँगाले तिम्रो स्पर्श खोजीरहेछन्
तिमी आउँछौ भनेर
पर्खिरहें मैले
हरियो बर्को ओडेर
तिमी आएपछि
टोलायौ,एकोहोरो टोलायौ
हावामा फुर्फूर नाचेर
म तिमीलाई ब्युँझाउँन खोजीरहेछु
म तिम्रो लागिनै हुँ
टिपेर राख शिरमाथि
अथवा ,पिऊ राखेर कप कपमा
स्वीकार्य छ मलाई
मायाका हरेक अध्याय
मलाई तिम्रो प्रेम पत्र चाहिन्न
न चाहिन्छ रँगले भरिएका नक्कली कार्डहरू
रमाउँदै फूलिरहेको गुलाफको
घाँटी निमोठेर दिएको उपहारको पनि के अर्थ
म तिम्रा केही क्षणहरू माग्छु
चाहे मेरो अँगालोमा तिमी उभिरहु
चाहे मेटाइरहु तिम्रा हरेक तृष्णा र थकाई
मेरा एक एक चुस्कीबाट
म जन्मेकै तिम्रो लागि हो
तिम्रा हरेक नजर म माथि पर्छ पर्दैन
घरि घरि कुहिरो र बादलसँग जिस्कँदै
तिमीलाईनै कुरिरहेछु
म कहिल्यै भन्दिन तिमीलाई-
मलाई सजाऊ कुनै परिधान दिएर
देऊ जीवनभर नमेटिने उपहार
अथवा भन पटक पटक दोहोर्याएर-‘आइ लभ यु’
ती सबै लाग्छन् मलाई बकबास्
तिमी सुम्सुम्याऊ मेरा अँग अँग
अथवा , लेऊ बेला बेलामा असीम चुस्की
तिम्रा हरेक सन्तुष्ठीमा
मात्र मेरो उपस्थिति चाहन्छु म
देखेनौं
तिम्रो एक उपस्थितिले
हरियो जूनेली रँगमा
रँगिएको छ मेरो सँपूर्ण मुहार
म तिम्रा हरेक क्षणहरू
हरिलो भरिलो कामनाका
गीत गाउँदै उभिइरहेछु

-कन्याम ,इलाम
२०७५ माघ २०