Tag: flower

दामोदर पुडासैनी किशोर – बेइजिँगका फूलहरू

फूलहरू
कहिले हावासँग
र कहिले गाडीसँग
जिस्कन्छन् बेइजिँगमा
बर्षातको बेला
फूलहरू
प्रेमका पुराना कंथाहरू सँझन्छन
र छाता ओडेर काममा हिँडिरहेका युवतीहरूसँग
प्रेमको अर्थ सोध्छन्
एकतिर
जाम भएका गाडीका लहर छन्
अर्कातिर
पानीले चुमिरहेका पात र हाँगाहरू बीचमा
पानीकाो बर्बरता ब्यहोरेर
बिग्रेको श्रृँगार सँभाल्दै बिरहका पुराना गीतहरू सँझिरहेछन्
जात जातका फूलहरू
लामबध्द छन् सडकका किनारहरूमा
हाँगाले पनि सिमाना नाघ्न पााइन्न
फूलले पनि सिमाना नाघ्न पाइन्न
मान्छेहरूको त के गर्नु कुरा
सधै दौडिरहन्छन् समयका किनारहरूमा
हावासँग
जिस्किहन्छन्
पानीसँग मस्किरहन्छन्
सडकमा हिंडिरहने पुतलीहरू
र आफूमध्ये
को राम्रो भन्ने दाँज्दैछन् फूलहरू
उभिएर सडकको बीच बीचमा

२०७५ चैत्र २६ मँगलबार (२०१९ अप्रिल ९ )
बेइजिँग ,चीन