सुरेन उप्रेती – सपना
विहान तीन बजे देखि नजिकैको
मस्जीदबाट छाना नै उचालौंला झैं गरेर
विरक्तलाग्ने धुन आउन शुरु गर्छ ।
म कोल्टे फेरेर निदाउन खोज्छु ।
अहँ निन्द्रा पर्दैन ।
झन लामो स्वरमा आवाज चर्किन्छ ।
दिंउसो गर्मिमा आफुले गर्नु पर्ने काम सम्झन्छु ।
५० डिग्रीको तातोमा
सेफ्टीबुट पन्जा र हेलमेट लगाएर
बिस तला माथि चढेर
फलामका रड जोडेर फर्मा कस्नु पर्छ ।
रेड सीबाट आएको तातो हावाले हान्दा
शरिरको रगत नै सुकेजस्तो हुन्छ ।
शरिर वैलाएको साग जस्तो बन्छ ।
उफ्
तातोले गर्दा जीउ नै लल्याक लुलुक हुन्छ ।
केहीकथम उँगियो मात्र भने ।
इहलिला समाप्त हुन्छ ।
अस्तिको वंगाली केटाको जस्तै
रातिपनि सुत्न ढिला भयो
एउटै कोठामा ६जनाको बसाईछ
सबैका आफन्तको फोन आउँछ
झन यो चाडपर्वका बेलामा त
कुना कुनामा रुवावासी चल्छ ।
छोरीले आउने हैन बाबा भन्छे
छोरो कहिले आउने बाबा ! भन्छ
बा पनि ,अब आइज, अब आइज भन्छन्
आमा ठूले जसो परे पनि एतै आइज भन्छिन्
उनको वोली पूरा हुँन पाउँदैन
घकानिएको आवाज र सुँक्क सुक्क मात्र सुनिन्छ ।
दिदी र बहिनी पनि आएका रहेछन्
यो बर्ष दिनको चाडमा पनि आउन नमिल्ने
कस्तो जागिर हो तेरो !
भो आइज भाइ हामी पनि तँलाई भेट्न
भने पछी गला अबरुद्ध भएर वोल्न सक्दैनन् ।
श्रीमतिको पालो आउँदा रातको
एक बज्नै लागिसकेछ ।
आउँने भन्दा भन्दा दसैंमा पनि मिलेन
तिहारमा त मिल्छ होला भन्नु हुन्थ्यो
सबै दिदीबहिनीहरु आएकाछन् ।
मेरो पनि भाइ टिकालाउन आएकोछ ।
उनको वोली अड्कियो ।
फोन काटियो ।
गाउँका अतितहरु सम्झनामा हराउँन थाले
घर सिंगारेको देखि रोटेपिङ र
लिंगेपिङ लगाएको ।
क्लब बनाएर देउसी भैलो खेलेको
पाटी डाँडाका छेउमा पिंङ र डाइस
खेल्नहरुको रमाइलो ।
दिदी बहिनीले दियो
कलश र तेलले छेकेको
दीर्घायूको कामना गर्दै ओखर फोरेको
सप्त रंगी टिका सयपत्री
र मखमलीको माला लगाइ दिएको !
थालभरी फलफूल सेलरोटी मिठाइ राखेर
रंगिन रुमालले ढाकेर दिएको ।
उपहारहरु दिंदै दिदीबहिनीका
गोडा ढोगेका क्षणहरु
तँछाड मछाड गर्दै आए ।
तर म त यो खाडीमा
हाँडीमा भुट्दै गरेको मकै झैं
मेरो कार्यक्षेत्रको योकुना र
त्यो कुना हुँदै छट्पटाउँदै छु ।
मेरो एउटै सपना छ ।
अर्को सालसम्ममा
सग्लो शरिरमा
आफैं हिंडेर स्वदेश जान सकौं
बन्दबाकसमा कैदी बनेर फर्कनु नपरोस्
फेरी पहिलाका झैं
डम्फु र मादल बजाउँदै
देउसी र भैलो खेल्दै हिंड्न पाउँ ।