कोमल श्रेष्ठ मल्ल – चिरिरहेछन कलिला छातीहरु
नब निर्माण चाहनाका
बम बारुद पड्केर
चिहान चिच्याउदै
चिता खरानी मडारीएको आकाश हेरेर
धरातलमा लम्केका छ सय एक मलामीहरु
एउटै क्रिया गरी रहेछन
पटक पटक बैतणीको पुच्छर समातेर
स्वप्नील शान्त स्वर्गका लागी ?
कठै !
अनाथ बिदूर बिधवाका तातीमा
पालै पालो स्वाङको शहीद थपिंदै थपिंदै
त्याग तपस्या बलिदानका चार किरण मास्दै
शहीदगेट भत्की रहेछ !
नंपुसक भालेको बसाँईमा
तमासाका भेडाहरु
भोगी रहेछन बिभत्स यातनाहरु
शिबिर शिबिरमा
डरको राँको तापेर
आरोह अबरोहका
लोडसेडीङको बस्ती भोगेर
तैपनी नपुगेर
रक्त पिपासु बाघहरु
चिरिरहेछन कलिला छातीहरु ???