अबिर खालिङ्ग – ऊ
फिदाइन पाइलाहरु हिंडेर
ऊ गई हाम्रो गाउँबाट टाढा
कोलाहलको कपिलवस्तु घुम्न
वोधिसत्व बेईमानीको बगदादमा हेर्न ।
चर्चवेलमा कसरी पड्कन्छ आजकल बम
कसरी मस्जिदमा पस्छ साइकलसँगै
आतंकको ठूलो स्वर ?
मन्दिरहरु गुरूद्वाराहरुमा लादेनको निश्वास छ
ईश्वर निर्वासित छ वर्तमान ।
लुंग्दरमा छ कि ?
बिहानीको चरीको गीतमा पो छ कि ?
डावामा छैन, पानीमा छैन
मान्छेको गीतमा छैन ।
रेलको चर्को सिटीमा
नरसंहारको गीत गाउँदै ऊ गएदेखि
अँह, ऊ आएकी छैन
हाम्रो गाऊँमा
मान्छेको गाँउमा ।
(Sent to Sanjaal Corps via Email)