डा.चेतबहादुर कुँवर – राष्ट्र एक ढिक्का
(मधुपर्क बैशाख, २०६७)
कतै हामी हिन्दू कतै हामी बौद्ध
कुनै छौं किराँती कुनै हामी सिख
कोही छौं क्रिस्तानी कोही मुसलमान
जात धर्म खालि महिला पुरुष ।
चाहे हामी हिमाली चाहे मधेसी
चाहे छौं पहाडी सबै एक वासी
चाहे भिन्न धर्म चाहे भिन्न भाषा
अमूल्य सम्पत्ति नेपालका खासा ।
छुट्न किन चाहन्छौ एकार्कोबाट
एकै देश हाम्रो मिलेमा विराट
परेको छ चिरा छाती लौ आमाको
मेटौं है अवश्यै चीत्कार आमाको ।
किन सोंच्छौ व्यथै एकअर्को भिन्न
हात हात मिले सब छौं अभिन्न
बन्ने छ सुनको यो अमूल्य सिक्का
अटुट अवश्यै राष्ट्र एक ढिक्का ।