हेपेन्द्र राई – धर्तिका शोभाहिन फूलहरु
धर्तिका शोभाहिन फूलहरु
जसलाई जति डिग्रीको कोणबाट खिचेपनि
उस्तै सुन्दर देखिने
जस्तो सुकै मौसमा पनि उहि रुप रंगमा भेटिने
देख्ने जो कोहिको मन मन्त्रमुग्ध पार्ने
यी फूलहरुको काँडा छैन
कसैलाइ छेकबार गर्ने डाँडा छैन
जसको मुल्य छ
महानता छैन
आत्म छ
अस्तित्व छैन
सुन्दर छ
शोभा छैन
फूल हो
सुवास छैन
दुइ, चार पाउन्ड तिरेपछि
यी फूलहरुलाई पैतालाले किचे पनि भयो
जीउले थिचेपनि भयो
या हातले मनखुसि मिचेपनि भयो
हाँगा हाँगा डुले पनि भयो
थुँगा थुँगा टिपेपनि भयो
धित मरुन्जेल रसहरु चुसेपनि भयो
पाएको समयभरि
डाली डाली टेकेर पातहरु लुछेपनि भयो ।