शिव प्रकाश – रावण कौरव युद्ध
कुरुक्षेत्रको धर्मयुद्ध होइन, र्
धर्मसस्थापनार्थ लडिएको
त्रेतायुगको सत्ययुद्ध पनि होइन,
असत्यमाथि सत्यको विजय भएको
यो युद्ध !
अधर्मको युद्ध/असत्यको युद्ध
अहंकारको युद्ध/आदिम संस्कारको युद्ध
घमण्डको युद्ध/क्रोधको युद्ध
लोभको युद्ध/मोहको युद्ध
अज्ञानताको युद्ध/अन्धकारको युद्ध !
रावण-कौरवको युद्ध हो,
यो युद्ध !
यो युद्धमा
रावण र रावणगण एकपक्षमा हुन्छन्
कौरव र कौरवगण अर्कोपक्षमा हुन्छन्
गणनायकहरु युद्धको दुन्दुभि बजाउछन्
गणहरु आपसमा शस्त्रअस्त्र वर्षाउछन्
यो युद्धमा
युद्धको दुन्दुभि बजिरहन्छ
युद्धको संक्रमणमा मारकाट चलिरहन्छ
रगतका खोलाहरुले धरतिलाइ बगाउन थाल्छ
सन्त्रास ! कोलाहल !
आर्तनादका शब्दध्वनीहरु मच्चिइरहन्छ
रावण-कौरवगणहरु
यसलाई मंगलधून ठान्छन्
अधर्मगामी र असत्यमार्गी
रावण-कौरव एउटै सिक्काका दुइपाटा हुन्
त्यसैले रावण-कौरव युद्धमा
युद्धको कुनै नियम हुदैन
त्यहाँ निशस्त्र स्वतन्त्रताहरु मारिन्छन्
अस्मिताहरु बलत्कृत हुन्छन्
विचारहरु ढालिन्छन्
आस्थाहरु किचिन्छन्
आदर्शहरु बाँधिन्छन्
निष्ठाहरु भत्काइन्छन्
सभ्यताहरु लुटिन्छन्
विवेकहरु बन्दी हुन्छन्
विश्वासहरु धाइते हुन्छन्
अधर्म र असत्यको
रावण-कौरव युद्धमा
जसले जिते पनि
जित अधर्म र असत्यकै हुन्छर्
धर्म र सत्यको जित त अब
तब मात्र हुन्छ
जब राम र अर्जुन फेरि जन्मछ ।
हरैंचा/मोरङ , हालः बोष्टन/अमेरिका