मैले हाम्रो पिर्थिवीलाई
थालीजस्तै ठानेको
चेप्टोचेप्टो, थेप्चोथेप्चो
होला भन्ने ठानेको
तर यो त सुन्तलाको
दानाजस्तै रहेछ
सुन्तला र भोगटेझै
गोलोगोलो रहेछ
रातो सुर्जे उदाएर
पिर्थिवीलाई घुमेर
फन्का मार्छ होला भन्ने
मैले ठानेको
तर हाम्रै पिर्थिवीले
फन्का मार्दो रहेछ
बीचमा पारी सुर्जेलाई
यसले घुम्दो रहेछ
विज्ञानको रंगीचंगी
किताबमा हेरेर
आज मैले यत्ति कुरा
पढीगुनी जानेको
पढ्नुभन्दा अगाडि
मैले ‘उस्तो’ ठानेको
पढेपछि थाहा भो
कुरा ‘यस्तो’ रहेछ ।