जाडो बढिरहेछ
निरन्तर जाडो बढिरहेछ
मान्छेहरू यसबेला आगोको खोजीमा छन् ।
जाडो सहिनसक्नु भएपछि
म खोज्दै हिँडे आगो
यो देशको हरेक कुनाकाप्चासम्म
मान्छेहरू सबै यस बेला आगो ताप्न चाहन्छन्
तर, कसले ल्याउँछ आगो –
यो एउटा गम्भीर प्रश्न छ ।
सहिनसक्नु जाडो खप्नमै अभ्यस्त छन् मान्छेहरू
जाडो यो देशको
यो परिवेशकै विशेषता बनिसक्यो
जाडो यति शक्तिशाली भएको छ कि
आगो स्वयं हिउँझैँ चिसिन बाध्य छ यसबेला
लाग्छ जाडोकै सिरक आढेर
जाडोकै सिरान ओच्छ्याएर मध्यन्रि्रामा छ आगो ।
ठीक त्यसै बेला
साक्षात प्रमिथियसको भेषमा
शक्तिशाली आगो लिएर उपस्थित भयौ तिमी मेरो सामु
जब बेस्सरी खोजिरहेथेँ म आगो ।
तर, तिमीले ल्याएको आगो कहाँ रहेछ र जाडोका विरूद्ध –
जाडो छल्न जब पुगेको थिएँ तिमीले ल्याएको आगोनिर
हेर्दाहेर्दै त्यो त विनाशकारी डडेलो भइदियो
हेर्दाहेर्दै जलाइदियो त्यसले मेरा कलिला सपनाहरू ।
जाडो बढिरहेछ
सहिनसक्नु गरी जाडो बढिरहेछ
तर, आगो जाडोका विरूद्ध होइन
जीवनकै विरूद्ध दन्किरहेछ ।