मरुटोलको एउटा गल्लीको
डेरा कोठामा जन्मिएको
रामानुज खरदारको छोरा ऊ
गल्लीको स्कुलमा पढ्दै खेल्दै
कवि बन्ने चेतनामा पो पुग्यो
रामानुज खरदारको छोरो ऊ
कवि बनेको
तीन दशक, तेस्रो हप्ता भयो
तर ऊ कवि बनेदेखि यता
उसले चारपटक जेल र
थुप्रै तिरस्कार पाएको छ
तैपनि छोडेको छैन
रामानुज खरदारको छोरोले
कविता लेख्न
रामानुज खरदारको छोरो ऊ
असजिलो कवि हो
वास्तवमा
सत्तालाई, क्रुरलाई
दलाललाई, गद्दारलाई
असजिलो हुन्छ इमान्दार कवि