गंगा राम गौतम – सरकार… मलाई पनि अचम्म लागिरहेछ !
संवृद्ध नेपाल सुखी नेपाली
नारा घन्कीरहेको मेरो राज्यमा
मानिसहरू रोएको देख्दा
घरदेखि सडकसम्म कराइरहेको देख्दा
खै कुन्नी किन हो सरकार…
मलाई पनि अचम्म लागिरहेछ !
नुनको सोझो गरेझैँ गरेका तपाइहरु
संवृद्धिको बाटोमा लम्केका ती पाइलाहरु
सम्माननिय र उहाँका पी.ए.का मुहारका घामहरु
मेरा प्रियजनहरु आरिसले जल्न लागेर त होइन ?
खै कुन्नी के देखेर हो सरकार…
मलाई पनि अचम्म लागिरहेछ !
देश स्विजरल्याण्ड बन्न लागेको बेला
किसानहरु उखु पनि नुनिलो भो भन्छन्
घरमै बसी-बसी खान दिन्छौँ भन्दा पनि
जसरी तसरी हामीलाई काम पो भन्दछन्
के साच्चै देश स्विजरल्याण्ड बन्न लागेर त होइन ?
खै के गर्न खोज्या हुन कुन्नी सरकार…
मलाई पनि अचम्म लागिरहेछ !
गोर्खाली इतिहास बोकेका मेरा छोराहरु
नाथे बहिनी र छोरीलाई बलत्कार गरि हिँड्छन
दोषीलाई दण्ड सजाय दिनुपर्ने कानुन
न्यायको नाममा निर्दोषलाई नै जलाइ हिँड्छन्
कतै अध्यारो अदालतमा बत्ति बल्न लागेर त होइन ?
खै कुन्नी किन रोइरहेछन् सरकार…
मलाई पनि अचम्म लागिरहेछ !
संवृद्धितर्फ हिँडेको मेरो राष्ट्र
आज आफै-आफैमा सिमाना बेचिरहेछ
खुसी नेपाली लिन हिँडेको पानीजहाज
आज आफ्नो बाटो आफै मेटिरहेछ
कतै ठुलो स्काभेटरले बाटो खन्न लागेर त होइन ?
खै कुन्नी किन हो सरकार…
मलाई पनि अचम्म लागिरहेछ !
हरेक दिन विमानस्थलमा ओर्लिने काठका बाकसहरु
कहिले उखुघारी त कहिले मन्दिर र मज्जिसभीत्र
जबरजस्ती थुनिएका ती बहिनीका सासहरु
दिनहुँ जसो बिदेशी भूमिमा पलायन भएका मेरा दाइहरु
अनि देशमा केही गर्छु भन्दा पनि नपाएर भौतारिएका मेरा भाइहरु
किन निराश छन् कुन्नी सबै, देश ढल्न लागेर त होइन ?
खै कुन्नी के देखेर हो सरकार…
मलाई पनि अचम्म लागिरहेछ !
कहिले दाइजो नल्याएको निहुँ त कहिले छोरा नजन्माएको निहुँ
खोजी-खोजी नयाँ निहुँहरु अनि जलाइएका नारीका घरबारहरु
दुर्बल आत्मा, मार्मिक पिडा अनि लुटिएका अस्मिताहरु
तर पनि खै पटक-पटक समाल्दै छन् भत्किएका दरबारहरु
कतै साच्चै मानवताको आगो बल्न लागेर त होइन ?
खै कुन्नी किन हो सरकार…
मलाई पनि अचम्म लागिरहेछ !
चुँडिएको प्राणमा बाँकी रहेको केही इज्जत जस्तै
संवेदनाहीन शहरका शालिन मान्छेहरु
गास,बास,कपास र जीवनको भयंकर सपना देखेर
मर्नु र बाँच्नुको दोसाँधमा कुबेर बन्न हिँडेका प्रदेशी भान्सेहरु
कतै साच्चैमा देश बन्न लागेर त होइन ?
खै कुन्नी के देखेर हो सरकार…
मलाई पनि अचम्म लागिरहेछ !
धेरै पछि आज…
आफुले आफैलाई ऐनामा देखेर होला सरकार…
मलाई पनि अचम्म लागिरहेछ !!!
बलेटक्सार गुल्मी हाल काठमाडौं