दामोदर पुडासैनी किशोर – पोखरामा बिजुली नचम्केको बिहान
यो रात
बिजुली चम्केन पोखरामा
घाम खोज्न गएको बिहान
आइपुगेको छैन
अहिलेसम्म
माछापुच्छ्रे
किन यत्ति उदास उभिएको छ
सेतो परिधाननै फ्याँकेर
सन्तोषमा सुत्न सकेन रात
हुरी बनेर बत्तिरह्यो श्वासको गति
दिनमा पनि
घामनै बसाईँ सर्ला जस्तो छ
कतै टाढा
अथवा डुब्छकि कसो फेवातालभित्र
रातको मातले लडखडाउँदै
कसैको प्रतिक्षामा
मौन उँघिरहेछ लालुपाते
यो फूलबुट्टे पोखरामा
ढकमक्क फूलहरू छन्
ताल ,पहाड र हिमालमा
तर ,रातभर वास चलेन
सुस्केरा नसाटिएकोएको बरबादमा
पोखरा ग्रयाण्डी होटल,पार्दी ,पोखरा
२०७५ मंसिर १४