नेपाली कविता को बिशाल संग्रह
सामर्थ्य – नित्से
“भगवान खोज्न
नित्से दिउँसै लालटीन लिएर निस्कन्थे”
दर्शनशास्त्रको एक कक्षामा प्राध्यापक भन्दैथिए
सबै अचम्मित भएर सुनिरहेकै बेला
कोही कुनाबाट बोल्न चाह्यो
उसले हावामा बिस्तारै हात हल्लायो
र भन्यो
“भगवानको परिभाषा के हो?”,
“देख्यौ! यस्तो छ स्थिति!
दानवहरु!”
उसले भगवान मान्ने गरेको
गुरुको कुराले उसलाई
देवतामाथि शङ्का उत्पन्न भयो
कहिल्यै नआउने गरी
उ कक्षाबाट निस्कियो
त्यसपछि उसलाई जसले देख्यो
उ भन्ने गर्थ्यो
“उसको हातमा ठूलो लालटिन थियो”
सामर्थ्य – पाटी
गन्तव्य बोकेर हिँडेका
केही हुल छापामारहरुले
शहीदका नाममा
एउटा पाटी बनाइ छाडेका थिए
जसमा
बालकहरु युद्धको सिको खेल खेल्थे
युवकहरु जम्मा हुन्थे र घण्टौँ टोलाउँथे
अनि वृद्धहरु मृत्यु पुकार्थे
यो प्रकृया चलिनैरह्यो
जबसम्म
केही लेख्न बुझ्न सक्नेहरुले सोचे
अब यो पाटीका भित्ताहरुमा केही लेख्नुपर्छ
उनीहरुले निक्कै मर्मस्पर्शी लेख्ने प्रयासमा
लेखे-
“यहाँ बस्ने तपाईं
या गन्तव्यमा हराउनु भएको छ
या गन्तव्य हराउनु भएको छ”
उनीहरुले यो बिर्सिसकेका थिए कि
गन्तव्य बोकेर हिँडेका
केही हुल छापामारहरुले
शहीदका नाममा
एउटा पाटी बनाइ छाडेका थिए
सामर्थ्य – इरिटेसन एनालाेजी
मन एकतमासको भएपछी
विकासको कुरा
निकासको कुरा
निरास हुँदामा हतासको कुरा
केही ठीक लाग्दैन
प्राकृतिक लाग्दैन;
भर्खरै आइपुगेर एक हात पानी पिउने रहर
बटिदारले आफ्नो बनाइदियो
बुखार लागेछ गिरत भन्दैछ अब्बास
निधार छाम्ने हर्कत गर्न मन छैन
निधारसम्म पुग्ने तागत पनि छैन
योपल्ट मौसमले बडो घात गरिदियो
व्यग्र भएर भनिरहेछ आफ्नो कुरा
एकाग्र भएर सुनिदिनुछ उसको कुरा
र यससँगै,
चार मन पैचो तिर्ने रहरले
फेरि अर्को टिकट काटेको छ
बडो अदबका साथ उसले गरेको नमस्कारले
मानसिकता त्रस्त भएको छ
मन एकतमासको भएपछी
बतासको कुरा
आकाशको कुरा
निरास हुँदामा अब्बासको कुरा
केही ठीक लाग्दैन
प्राकृतिक लाग्दैन
कारण:
भर्खरै उसकाे जाबाे एउटा समाचारले
समय संकटग्रस्त भएकाे छ;
मन एकतमासकाे भएपछि…….॥
