बेइमानहरूको यो भीडमा
एउटाले पनि विद्रोह गरेन
कोही पनि इमान्दार देखिएन
विश्वासका
आस्थाका
इमानका
भरोसाका पानाहरू
पुस्तकबाट गुँड छोडेर
अज्ञात लोकतिर उडिरहेछन्
पृथ्वीबाट
सब नैतिकताहरू
प्रेमहरू, पूजाहरू
आकाशमा बसाइ सरिरहेछन्
माटोमा कसाइ बढिरहेछन्
एक्लो चरो
बरको टुप्पोमा बसेर पछुतो गाइरहेछः
बेइमानलाई ठुङ्न सकिएन
इमानलाई रोक्न सकिएन
बेइमानहरूको भीडमा
एउटा पनि विद्रोही देखिएन