राजु “हिमांशु” – रित्तो गिलास ठिङ्ग उभिएको छ अहिले
रित्तो गिलास ठिङ्ग उभिएको छ अहिले
कतिपल्ट पानी
कतिपल्ट ह्विस्की
खनिएर यसमा
रित्तो भएको छ अहिले यो
यसले
सुरिला स्वरहरु सुनेको छ धेरै पल्ट
नुनिला आँसुहरु झारेको छ धेरै पल्ट
कतिपल्ट छछल्किएर
बन्धनहरु पोखाएको छ धेरै पल्ट
ठूलो दर्शन छाट्ने यसको ओठबाट
समाधान भने खसेन कहिले
जाबो समस्याको खोपिल्टा पुर्न सकेन कहिले
टोड्का परेर समस्याहरु खाड़ल भए
गिलास रित्तियो
साहस सिद्धियो
जून-ताराजड़ित आकाश चियाउने रहरहरु
बन्दी बने
आकाङ्क्षाहरु भयभीत हुँदै पलायित भए
सपना टुङ्गो लागेन
विपना उँभो लागेन
अवनतिको नदी बगिरह्यो चुपचाप
एकताको हात भाँचियो ट्वाक्कै
दागाको चिप्लोमा लड़ेर
रित्तो गिलास उभिरह्यो ट्वा परेर
रित्तो गिलास ठिङ्ग उभिएको छ अहिले
चुपचाप !
डाउहिल पथ, खरसाङ, दार्जिलिङ
– बिहीबार, 19 भाद्र, 2071