निर्मलकुमार आचार्य – आज देश टुक्रिँदैछ (गीत)
(Source: मधुपर्क असार, २०६८)
आज देश टुक्रिँदैछ, किनार भत्कँदो छ
लोत्तिरहेछन् डाँडा, हिमाल लच्कँदो छ ।।
हरियाली कक्रिँदैछ, पहरा खस्कँदो छ
सुकिरहेछन् नदी, धरती धस्कँदो छ ।।
सहकाल फेरिँदैछ, अभाव पस्कँदो छ
घटिरहेछन् बाली, अकाल मस्कँदो छ ।।
छलछाम चुलिँदैछ, विश्वास घस्कँदो छ
मरिरहेछन् आशा, हृदय चस्कँदो छ ।।
खुसीयाली मेटिँदैछ, वेदना लस्कँदो छ
फुलिरहेछन् गला, आलाप झस्कँदो छ ।।