विजय सागर – मन खुलेको छैन
(Source: मधुपर्क असार, २०६७)
हिजोआज
आकाश खुले पनि
मन खुलेको छैन
बम, बारुद र गोलीका आवाजहरू
रगतका पोखरी र फोहराहरू
आफन्तका गीँड र लाशहरू
मनमा यत्रतत्र छरिएका छन्
धम्कीका आवाजहरू र वल मिच्याइँहरू
मनबाट अझैँ हराएकै छैनन्
अनि मित्र !
आकाश खुले पनि
मन कसरी खुल्छ र ?
श्रवणकुमारहरूको हत्या गर्दै-धुन्धकारीहरू
चेत-अचेत अवस्था जहिले पनि
विध्वंश मच्चाइरहेछन्
पाइलैपिच्छे संत्रासहरू फैलाएर
भुँइचालो भइ थकाएर
घरभित्र बाहिर
जहाँतहीँ आतङ्क मच्चाईंरहेछन् ।
भन त मित्र !
यस्तो भयावहबीच
अकाश खुले पनि
मन कसरी खुल्छ र ?
प्यारा मित्र !
कोठाभित्र खुम्चिएर लुकेका हामी
हातमा हात मिलाएर
सन्त्रास र आतङ्कको
हुर्मत लिने गरी
जब गोला र बारुद भएर निस्कने छौँ
त्यो बेला
आकाश कालो-नीलो बादलले धपक्क ढाके पनि
हाम्रो मनचाहिँ खुला हुनेछ !
– हात्तीवन, काठमाडौँ