रातो लेटरबक्सबाट निस्कनेछ
दुष्टहरुका नाममा
पत्रबम
सलाईमा बन्दी बारुद
एकाएक सल्कनेछ
तीव्र क्रोधाग्निमा
चुरोटको धुवाँसँगसँगै
सोचमा डुब्नेछ
उज्यालो दिनको
गर्विलो शिर
दमकलमा भरिनेछ
पानीको सट्टा
अति ज्वलनशील पदार्थ
पेट्रोल
चुलोको आगोमा तातिनेछ
विस्तारै–विस्तारै
बिहान, मध्यान्ह
र रात्रि
बिजुलीको लट्ठामा झुन्डिनेछ
करोडौं–करोडौं वाटको
सूर्य
र तिम्रो देब्रे नाडीको
रेडियम घडीमा
बज्नेछ
यो देशको सबभन्दा चम्किलो
समय
(२०४२)