निष्प्रभ सजी – सपना, आकाश र बस्तीहरू
यी टुक्रा टुक्रा बादलहरु
जोडीए हुन्थ्यो एकै चोटी
जे हुनु छ
भए हुन्थ्यो छिट्टै
भोली सखारै खुले हुन्थ्यो आकाश
धेरै भयो
क्षितिजमा नपोतिएको इन्द्रेणी
पर्नै खोजेको भए
परे हुन्थ्यो चट्याङ
बग्नै खोजेको भए
बगे हुन्थ्यो पहाड
म होश मै छु
र मलाई यो पनि थाहा छ
हामी
पहाडकै जरा समातेर झुण्डिएका छौं
हुन त, यो अँध्यारोमा
कहाँ जिउँदा छन् र बस्तीहरु !
हेमजा, कास्की, हाल: अष्ट्रेलिया