बिकु लामा – देश खोजिरहेछु
गौंथलीका बच्चाहरू
गुँड छाडेर कतै
अस्थायी बसाइँ सरेका छन
गुँड छाडनु अघि
चराले पनि मन दुखाउँदो रहेछ ।
जस्तो कि
आँखाबाट सपना हराउँनु
मनबाट समवेदना हराउँनु
गीतबाट लय हराउनु
शायद लाग्दो हो मलाई जस्तै
जुन र घामको झैं दुरीको आभास
देशछाडी जानेहरूलाई
अब ऊ
देशको नक्साबाट ओझेल पर्दैजान्छ ।
यो सपनाको शहर
मेरो घर जस्तो लाग्दैन मलाई
घरवार बिहिन भएकोछु म तिम्रो देशमा
तिम्रो गगनचुम्वी महलहरूको देश
तिम्रो समुन्द्र नै समुन्द्रको देश
मलाई कहिल्यै छुदैनन यी कृत्रिम सौन्दर्यताले
हो यतिबेला
म मेरै देशको
सगरमाथा सम्झेर रोइरहेकोछु ।
तिम्रो आधुनिक शहरमा
कहिल्यै फुल्दैनन लाली गुँरास
कहिल्यै उड्दैनन शान्तिका परेवा
कहिल्यै बज्दैन सदभावको गीत ।
एउटा सपना पुरा गर्न पनि
हजारौ सपनाहरूको विनिमय गर्नुपर्छ यहाँ
तिम्रो देशमा त
पत्थर जस्ता मान्छेहरू
मेरा पीडामाथी अट्टाहस गर्छन्
कागजका फुल जस्तै मान्छेहरू ।
अव म,
हतारिएको छु देश फर्कन
राष्ट्रियता भन्दा ठुलो
हैन रहेछ सुनको दरवार
हैन रहेछ पैसाका बिछ्यौना
झिलिमिली रोबर्ट्को देशबाट
देखिरहेकोछु म हरेक रात
मेरी आमाको सपना
साँच्चै म यो परदेशबाट
मेरो देश खोजिरहेछु ।
Tag: biku lama
Biku Lama – Aadim Ishwar
बिकु लामा – आदिम ईश्वर
मैले युगौँदेखी
पुज्दै आएको मेरो ईश्वर
किन रक्तपात गरिरहन्छ
मेरै आस्थामाथि
किन गरिरहन्छ बारम्बार हत्या
मेरा भावनाको फुलहरुको ।
पत्ता लगाउनु छ अब
ईश्वरको नयाँ बासस्थान
लगाउनु छ एक फन्को पृथ्वीलाई
चहार्नु छ मन्दिर, मस्जिद, चर्च र गुम्बा
आदिम ईश्वरलाई भेट्न
हो, भौतारिएको छु म धेरै पटक ।
आफ्नै हृदयको बली दिएर
धेरै पटक चढाएको छु
धुपजस्तै सल्काएर आफैलाई
तर मेरो ईश्वर
मसँग कहिल्यै साक्षातकार भएन ।
मौसम बदलिए जस्तै
किन बदलिन्छ होला
अवतारैपिच्छे ईश्वरको रुप
सत्ता फेरिएझैँ छिनछिनमा
किन परिवर्तन भइरहन्छ हँ ईश्वर पनि !
आफ्नै साम्राज्य बनाउन
किन तल्लिन छ ऊ ?
करोडौं अस्थिपन्जरको चुली उठाएर
बनाइरहेछ चिहानको बीभत्स पहाड
साँच्चै एक दिन ईश्वर पनि
पुरिनेछ त्यही पहाड खसेर
र, पुरिनेछन् मान्छेका समस्त भ्रमहरूपनि ।
किन उस्तै–उस्तै लाग्छन् पत्थर र ईश्वर ?
जो कहिल्यै बुझ्दैनन्
हाम्रा मनका मूच्र्छनाहरू
जो आवाजविहीन भइरहन्छ सधैँ,
हामीले भक्ति र उपासना गरिरह्यौँ
कथित ईश्वरको
अनि पर्खिरह्यौँ एउटा सिङगो युग ।
अचानक आज फेरि
मेरै बिरुद्धमा उभिएको छ ईश्वर
मेरा विश्वासका फूलपाती कुल्चेर
मंगलधुनकै विपक्षमा
किन क्रुर बनेर उभिएको छ
मेरो आदिम ईश्वर ?