Tag: चाँदनी शाह

चाँदनी शाह – तिमीलाई हाँसेर

तिमीलाई हाँसेर बिदा मात्र दिइसकेथें
आशु झरिसकेछन् (म तिनलाई पुछ्न थालें) २
तिमी मलाई छोडी गैसकेको मात्र के थियौ
तिमी फर्कने दिन (म हतारिदै गन्न लागें) २

(यो दुई दिनको विछोड पनि कति नमीठो
के बिर्सिए जस्तो हराए जस्तो नपुगे जस्तो) २
मान्छेको हुलबीच पनि शून्यपन कस्तो २
ताराहरुलाई छोडी चन्द्र लुकिदिए जस्तो

तिमीलाई हाँसेर बिदा मात्र दिइसकेथें
आशु झरिसकेछन् (म तिनलाई पुछ्न थालें) २
(यी दिन यी रातका हर पल नरमाइला
लाग्छ समय नै सुस्तिएर चलिदिए जस्तो) २
यी मीठा गीतका धुनका पनि कति झर्को लाग्दा २
फूल झरि काँडा मात्र बाँकी भइदिए जस्तो
तिमीलाई हाँसेर बिदा मात्र दिइसकेथें
आशु झरिसकेछन् (म तिनलाई पुछ्न थालें) २

स्वर : तारा देवी
शब्द : चाँदनी शाह

चाँदनी शाह – घाममा पनि माया

घाममा पनि माया लागेको छ
पानीमा पनि माया परेको छ
फूलमा पनि माया फुलेको छ
रुखमा पनि माया झुलेको छ
हामीले सायद देख्न सकेनौँ कि
देख्नुमै मायाको माने लुकेको छ

आँखाले पनि माया हेरेको छ
ओठले पनि माया बोलेको छ
मुटुले पनि माया धड्केको छ
मनले पनि माया बोलेको छ
हामीले सायद अर्थै बुझेनौँ कि
बुझ्नुमै मायाको अर्थ लागेको छ

भिरमा पनि माया अडेको छ
पाखामा पनि माया बसेको छ
खोलामा पनि माया बगेको छ
हिउँमा पनि माया जमेको छ
हामीले सायद होसै गरेनौँ कि
होसमै मायाको मर्म बाँचेको छ

शब्द: चाँदनी शाह
संगित: नातिकाजी
स्वर: तारादेवी

चाँदनी शाह – तिम्रा पाउहरूमा

तिम्रा पाउहरूमा म सँधै झुकिरहन्छु
तिमी उठाइरहू माया र आषिस थपी
तिमी भरिरहू सिउँदो म नुहिरहन्छु
नटुटोस् अब सिलसिला कहिले पनि

सगरमाथालाई छुने उषाको लाली झैँ
तिम्रो मायाको सृङ्गार सँधै सजिरहोस्
निरन्तर बग्ने यी खोलानालाका धुन झैँ
तिम्रो प्रेमको झंकार सँधै गुन्जिरहोस्
तिमी आँखाले बोलिरहू म पढिरहन्छु
नपरोस् आवश्यक शब्द कहिले पनि

परमात्मासँग आत्माको सम्बन्ध रहे झैँ
मेरो मन तिम्रो अर्चनमा डुबिरहोस्
अज्ञानलाई सँधै ज्ञानको खोज रहे झैँ
मेरो आराधना सँधै तिम्रो रहिरहोस्
तिमी आइरहू यस्तै म बोलाई रहन्छु
नछुटोस् यसको क्रम अब कहिले पनि

शब्द: चाँदनी शाह
संगित: नातिकाजी
स्वर: तारादेवी