जनक कार्की – हल्ला नगर
इस्स्स्स्स्स चुप!!
सरकार सुतिरहेको छ
हल्ला नगर्नुस कृपया।
कपडा
बजारभरी दोकानहरु
बेचिरहेछ
लाज छोप्ने कपडा
भित्र देखि बाहिरसम्म
ढाकिने वस्त्रहरु।
लुकाउन चाहन्छ
कपडा भित्र
आफ्नै चित्र
डराउछ
कमजोर जगमा ठडिएको घर
हावामा उडेर गुडिरहेको गाडी
जाम भैरहने सेफ्टी ट्याकीं
बैंक खाली पारिएको ढिकुटीको सेफ बक्स
जब देख्छ उसले
क्याराम खेलिरहेको युवा
मकै बेचिरहेको बुढी आमा
क्याबिन रेस्टुरेन्टबाट सकेंत गरिरहेका युवती
समाचार बेचिरहेका हकरहरु
अनि आत्तिन्छ
नजर लाग्ने हो कि
पींजडामा थुनेर राखेको गरिबी
दराजमा झुण्डाएका रोजगारी
माकुराको जालो लागेको घोषणापत्र
अर्मानी
लिभाईज
अ्मेरिकन इगल्सले
पर्दा भित्र बेरेर
लुकाएको बिपनाहरुले
देखाएको छ सपनाहरू ।
कपडा पसलको ग्राहक
लाखौ कोशिसको बावजुद
उ देखिरहेछ पारदर्शी
छर्लङ्ग कृस्टल किलिएर
तर जानवरहरु
कपडा पसल कहिले छिरेनन
कतैबाट देखिएनन नाङ्गो।
तपाईलाई भोक लागेको हो?
तपाईलाई अन्याय भएको हो??
तपाईलाई चित्त नबुझेको हो???
किन चिच्चाइरहेको?
किन निर्वस्त्र भएको?
किन उफ्रेको ?
किन सन्केको?
इस्स्स्स्स्स्स्स्स चुप!
सरकार निदाइरहेको छ
हल्ला नगर गर्दै नगर
कुम्भकर्ण जाग्यो भने
के हुन्छ सोचेका छौ?
अनिकाल लागिसकेको छ
भोको कुम्भेले खानेछ तिमीलाई।
सपना देख्दै छ
नयाँ मुलुक बनाउने
हल्ला गर्दै नगर
अहिले सपना बिथोलिन सक्छ
सपना बिथोलियो भने
तिम्रा हल्ला गर्ने जिब्रो थुतेर
निमुखा बनाइदिन सक्छ।
उसलाई मनपर्दैन
कोहि चिच्च्याएर बोलेको
उ बैरो छ
अहिले सुन्छ फेरि।
गरिबी निर्मुल पार्न उसले
सोचिरहेको छ
नयाँ योजना बुन्दै छ।
गरिवलाई नै सक्ने
उसको योजना छ
भोक लागेको हो??
नकराउनुस अहिले दुई थाल लाठीचार्ज
एक गिलास सिसाको गिलासमा
सिसाको तातो गोलीको जुस खुवाउँछ भनेको छ।।
इज्जतको ख्याल गर्नुस है
सरकारले रौसी पिएको छ
अहिले फेरि मातेको मान्छेले जे पनि गर्न सक्छ
करैकरले कर तिराएर बलात्कार गर्न सक्छ।
इस्स्स्स्स्स्स्स्स्स हल्ला नगर
चुप लाग
सरकार सुतेको छ।
बापुजीले भनेको मान
नराम्रो नहेर हेर्दै नहेर
नराम्रो नसुन सुन्दै नसुन
नराम्रो नबोल बोल्दै नबोल
किनभने सहरमा अहिले
गब्बर शिंह आएको छ
५० माइल पर वच्चा रोयो भने पनि थाहा पाउँछ
अनि नाचँ बसन्ती नाचँ भन्दै जवर्जस्ती नचाँउछ।
बल्ल खायौ तिमीले
भनेको मानेको थिएनौ नि
पायौ होइन उपहार श्री ५ बाट
अब देशमा राजतन्त्र आउदैछ
उ हेरत गणतन्त्रको पहिलो राजा
श्रीपेज लगाएर कसरी हात्ती सवार गरेको
तिमी कुकुर भुकेर के हुन्छ?
सुन्यौ होइन
बुझ्यौ होइन
इस्स्स्स्स्स्स्स्स्स चुप!!
सरकार सतिरहेको छ
हल्ला नगर्नुस कृपया
