Category: Damodar Pudasainee

दामोदर पुडासैनी किशोर – दुनै

डाँडाका छालहरूमा
कुहिरोको टोपि पहिरेर
जूनेली चित्रमा
अनुबाद हुन खोज्दैछन् पहाडहरू
नदीका महान मूर्च्छनाहरू सुँघेर
खोजिरहेछु मैले कसैको
पहाडभन्दा अग्लो बिश्वास

साँझहरू सर्बस्व सुम्पेर
सपना देख्न लालायित छन्
जीवन भित्रका पिलपिले ताराहरूको

हरेक साँझ
पिउँदा पिउँदै थकित बनेको शरीर
र, यारचा गुन्भुको जोड घटाउ
ठूली भेरीको बहाब जस्तै अनन्त बनेको छ
जसरी
गुमनाम भागेको
पतिको संझनालाई इख्याउँदै
पालैपालो जिल्लाका
ठूला हाकिमहरूलाई
स्कचका बोतलबाट
झिँगिन टि सर्ब गरेर
ईच्छा आकाँक्षाका सूचिहरू
सूचिकृत गराउँन
सफल हुन्छिन् सधैं
सहरकै सर्बोत्कृष्ठ मैतालु मैसाब

शहरका
घरका छानामाथि ठड्याइएका लिँगाहरूमा
मायाका नेजा फेर्ने हतारो छ हरेक नीला शरदहरूमा

लुकिचोरी लाएको मायाको मोल
नौ लाख चुक्ता गरेको छ भर्खरै
भियाग्राको पारखी यारचा ब्यापारीले
हरेक क्षण चुकुलको चाँजोपाँजोमा तम्सिरहेका
सरकारी कर्मचारीहरूबाट
तल्लो दुनैदेखि उपल्लो दुनैसम्मका होटलहरूमा
कटुवाल घोषणामा हुँदैछ
पाएको,लाएको र खाएको
अमिलो पारदर्शन

जागिरमा भर्खर छिरेका लोक सेवाका प्रियपात्रहरू
‘यसमा के छ ?’ र ‘ यो के कुरा हो ? ‘ को जबाफ खोज्दै
भौतारिरहेछन् भेरीका किनारहरूमा

उता भर्खरैको निर्वाचनमा
जोड घटाउ बिगार्न सफल जनप्रतिनिधि
दफा उपदफा लेखेको पुस्तक नभेटेर
र, कर्मचारीको अपब्याख्यामा धर्मराएर
कुर्लेर भाषण गर्छ –
तालाकुचि बोक्न्याहरूलेनै यहाँ
ध्वस्त पारिरह्याछन् राष्ट्रको ढुकुटी

जुफाल ,मोतिपुर र कार्कीबाडाबाट
पाचघण्टा पैदल हिंडेर
दश रूपैयाँ दाना स्याउ बेचेका
रानीसाहेब र मैसाबहरूले
झिसमिसेमै सुरूप सुरूप पिएका छन्
सिन्के चाउचाउको पिरो झोल
र किनेका छन् साँझलाई
एक बोतल खोयाबिर्के
फर्कदा भेरीको झोलुँगे पुल तरेर
माग्दैछन् डाक्टर श्रीकान्त अग्रवालसंग
रातमा पसिना आउँने र दिनमा पेट फूल्ने
रोगको औषधि
भित्रभित्रै उगुच पल्टेका कयौ घाउहरूले
टनटनि दुखाइरहन्छ रात र दिनलाई
त्यो सबै डाक्टरलाई देखाउन
लाज लागिरहेछ उनीहरूलाई

जिल्लाको ब्यथा टुँगियोस् जिल्लामै
नआओस् राजधानीमा
एउटा गहन चिन्तनमा छ सिँहदरबार
उता छार्का ताँगसोँग,भिजेर,तिन्जे र सालदाँगमा
राज्य पुग्नै नसक्ने निर्णयमा पुग्यो
जिल्लाका भद्र भलाद्मी र कर्मचारीको बैठक

लावन,शहरतारा र धो तिरबाट झरेका
एकहूल घोडचढीहरू
भर्खर ओर्लेका छन् पहेला घोडाहरूबाट
ठूलीभेरीलाई कहाँनेर थिचेर
बिच्छ्याउन सकिन्छ एउटा आरामदायी ओछ्यान
कर्के नजरले हेर्दैछन् कुना कुनाका मान्छेहरू

हतारमा गाँसिएको एउटा दूनो
फनफनी घुमिरहेछ
भेरीको अलल्ले छालहरूमा

सुनको सिरानीमा मस्त निदाइरहेको राजकुमार
सपना देखिरहेछ ब्यूँझेपछि धामी पतुर्ने

दुनै,डोल्पा,२०७४ भाद्र ३० गते शनिबार ।

दामोदर पुडासैनी किशोर – गढी दरबारका भग्नाबशेष सपना

एउटा डरलाग्दो दम्भ
ढलेको छ
भग्नाबशेष बनेर

पुरानो दरबारमा
चाँग लागेर बसेका
हरेक ढुँगाहरू
मौन साक्षी उभिइरहेछन्
र ,थाकेका छन्
मौन घोषणामा

बदलिने संसारसंगै
अनुहार बदल्न नसके
ढल्दोरहेछ पुरै शरीर

चराको एउटा सुन्दर गुँडलाई
च्यातचुत पारेको छ समयले
कहाँ गएहोलान् चराहरू
कहाँ गएहोलान् बचेराहरू
हिजोको रगजग सँझेर
एउटा चिल्थरो गुँड टोलाइरहेछ

रोक ,जिन्दगीलाई
भग्नाबशेष स्मारक बन्नबाट रोक
जिन्दगी भग्नाबशेष बन्यो भने
के पो बाँकि रहन्छ र
पश्चाताप बाहेक

हामीलेनै सुनेका हौँ
महाराजको सिँहनाद
हामीलेनै देखेका हौ
अरूको जिन्दगी ढालेर
आफ्नो जिन्दगी बिस्तार गर्ने
षढयन्त्रका गोप्य बैठक
हाम्रै सामु लुटिएको हो
कयौँ बेगवान घोडाहरूको
कलकलाउँदो जवानी

उ त्यो भित्ता र भुइँमा सुकेको दाग छ नि
त्यो राम्ररी स्वस्ती गर्न नजान्नेलाई
छ्याप् छ्याप् छप्काइएका
बबुराहरूको रगतको टाटो हो

पन्छाऊ, म माथि उम्रेको सिस्नुघारी पन्छाऊ
यहीँ कतै पुरिएको भेट्नेछौ तिमीले
महाराजको अधिकार पत्र
यहीँ कतै जीर्ण अक्षरमा भेट्नेछौ
महारानी र नानीहरूको
प्रेमका रोचक अभिलेख
यिनै कोठाका कुनै कुनाहरूमा भेटिनेछन्
कसैको मागमाथि तोक आदेशको पर्खाई

जिन्दगी भनेको
लहरनै हो रहेछ
कार्य र अस्तित्वको

गर्दा गर्दैका काम
लथालिँग छोडिएपछि
अनुबाद हुनेरहेछ भग्नाबशेषमा
डँगरँग ढलेको आफ्नै शरीर हेरेर
म सुदुर सपना देखिरहेछु

म नै हुँ
समयको चहकिलो कोलाज
म नै हुँ
समयको सुन्दर बकपत्र

मलाई बाँच्नदेऊ
मैले भन्न बाँकि छ
मेरो जवानीका कुरा
मेरो साँझ र मेरो बिहानीका कुरा
मैले केही भनिरहँदा
तिमीले भेटनेछौ तिम्रा पूर्वजहरूलाई
र तिमी आफैलाई

तिम्रो र मेरो पनि
भर्खरै शुरू भएकोछ नवीन सुस्केरा
त्यो नथाकोस् र नवनोस् कहिल्यै भग्नाबशेष

सबैबाट परित्यक्त बनेर
भग्नाबशेष बन्नुजस्तो पीडा
अरू के नै छ र जिन्दगीमा

प्रिय !
यतै कतैबाट त हो
प्रेम गर्न थालेको तिमीले र मैले
भग्नाबशेषको दुर्घटना
नउठोस् कतै बादल बनेर

प्रेमको भग्नाबशेष होइन
प्रेमको इतिहाँस बनाउँनुपर्छ तिमीले र मैले
शिखरका प्रत्येक परिबर्तनहरूमा

-२०७५ फागुन २१ गते
मकवानपुरगढी दरबार,गढी गाउँपालिका ,मकवानपुर

दामोदर पुडासैनी किशोर – इजरायलको स्वाद

हरिया थुम्काहरूमा
ढकमक्क फुलेकाछन्
सेता ईन्द्रकमलहरू
जहाँ रातभर
आकाशका सबै ताराहरू
भेला हुन्छन्
र दिउसभर
दहीका सेता ढिक्काहरूको
कथा लेख्छन्
केही मान्छेहरू
काँधमा मार्क्स बोकेर आऊँछन्
केही मान्छेहरू
मनमा बुध्द,हब्स ,लक र रुसो बोकेर
उकालो चढछन्
केही मान्छेहरू
ढोका ढकढक्याउँन आइपुग्छन्
रित्तो मन बोकेर
जो जो जसरी आएपनि
सबैले
भेडा चराउँदै मान्छेको मन खोजिरहेका पैगम्बर
र, मान्छेकै मन उजागर गर्दा
क्रसमा टाँगिएका यशुका
सुख दुखका कथा सोध्छन्
जैतुनका मसिना पातहरूमा
मान्छेहरू
निरन्तर
पहिले आफूले टेकेको जमिनलाई
त्यसपछि आफ्नो मनलाई
भूमध्यसागरझैँ निर्मल
र,भूमध्य सागरभन्दा महान सँभाबनाका
चित्रहरू
क्रमश: कुँद्छन्,कुँदिरहन्छन्
आमाहरू
छातीको एक भागमा देश
र ,अर्को भागमा नानीहरू सजाउँछन्
अरुले बनाएका झकिझकाउ गहनाहरूलाई
पुरानो सोकेशमा सजाएर
आफू भने
जन्मदै ल्याएका गहनाहरूबाट
अनबरत उज्यालो छर्दै
हिँडछन् ,हिँडिरहन्छन्
बिश्राम भन्ने शब्दलाई
शब्दकोषका पुराना पन्नाहरूमा
कैद गरेर
सपनाका सागरहरू
उमार्दैछन् भिराला धरातलहरूमा
र,मुटुका कुना कुनामा
उम्रेदेखि डाँडाका जुनसम्मका मान्छेहरू
मलाई बिश्वास गर
तिमीले दिएको बिश्वासको साटो
म दिन्छु तिमीलाई
माया फूलिइरहने मीठा गीतहरू
मान्छे ब्यूँझाउँने गीतहरू
लेख्न सक्तैनन् मान्छे बाहेक अरू कसैले
भनिरहेछन्
बेसीबाट उकालो चढिरहेका मान्छेहरू
रातभर कोही निदाएनन् बस्तीहरूमा
दिनभर कोही थाकेनन्
कारखाना र बारीका पाटाहरूमा
मान्छेको सर्बस्व मान्छेलाई सुम्पन सक्ने मान्छेहरू
मान्छे खोज्दै हिँडिरहेछन्
सँसारका फराकिला भित्ताहरूमा
यो जूनीमा त बिरामी बन्नेपनि
कहाँ फूर्सद छ र
जागिरहेका मान्छेहरूलाई

-२०७५ फागुन २९ गते बुधबार
(सन्२०१९ मार्च १३)
बेन्गुरियन बिमानस्थल,इजरायल