शरद निरोला – भनेर फाइदा छैन
भन्न थाल्यो भने किन भनिस भनेर भन्छन
बोल्न खोज्यो भने किन बोलिस भनेर रोक्छन
नभनुँ त मुख चिलाएर चौपट्ट छ भन्दा
बढ्ता हुन्छस तँ ? भनेर ठोक्छन
देशमा कस्ता कस्ता कुरा भा’का छन् कसले भन्ने?
कति करोड रुपियाँ कता गा’का छन् कसले गन्ने?
बाग्मती र टुकुचामा मात्र होइन मनहरामा पनि
शहरको ढल बगेको कसले देख्ने?
सागपात भनेपछि हुरुक्कै हुने काठमाडौंबासीले
चौंसुर-पालुंग खान छोडेको कसले देख्ने ?
रायोको सागका मूठाका मूठा
गुहे पानीमा धोएको कसले देख्ने?
सडकमा गाडीको जाम छँदाछँदै
मोटर साइकलको बिगबिगी कसले रोक्ने ?
पेटीमा दुई पांग्रे गुड्छन त सडकमा दुई खुट्टे हिडछन्
यो अचम्मको कैफियत कसले बुझ्ने?
न शान्ति छ न सुरक्षा छ
ज्यान संगको खेलबाड कसले हेर्ने
पार्टीपार्टीका बीच महासंग्राम छ
जनताको भलो कसले गर्ने ?
संबिधान नभए देश चल्दैन
त्यसको खाका कसले कोर्ने
जुनसुकै मूला आए पनि
घटीमा छ महिना माग्नै पर्ने !
देशभरि ठूल्ठूला नदी र नाला छन्
तिनका पानी कता फाल्ने
धाराका टुटी जोडले खोल्दा
स्वाँ-स्वाँ आवाज कसले सुन्ने?
जुन बेला बत्ती दरकार छैन
त्यही बेला बत्ती आइ दिने
रात भरि टुकी बाल्नु पर्दा
जनताको मर्का कसले बुझ्ने?
आफुलाई भन्छन जनताको नेता
जनता चाहिं सधैं यता न उता
यो हरिबिजोगको अन्त्य कतै छैन
यो समस्या कसले बुझ्ने?
विश्वमै दुर्लभ यी जन्तुलाई
नेपाली भनी कसरी भन्ने
देश त यिनले मासेकै छन्
दु:ख-पुकारा कोसित गर्ने ?