Tag: Nepali Kabita

दिल साहनी – चक्रबहादुर

हाम्रा मित्र राष्ट्रहरुका मित्रहरु
चक्रबहादुरले तपाइंको मुलुकमा आक्रमण गर्दा
हामीले आक्रमण गरेको नठान्नु होला कृपया
चक्रबहादुरले तपाइंको मुलुकमा मान्छे मार्दा
हामीले मारेको नठान्नु होला कृपया
हामी त बुद्धका चेला हौं
हामी त शान्तिका पुजारी हौं
हामी कहिले हतियार उठाउँदैनौ
हामी कहिले युद्धको मैदानमा हाम्फाल्दैनौं
नेपालमा जन्मेर के हुन्छ
चक्रबहादुर नेपाली नागरिक होइन
चक्रबहादुरको नेपालसित
खासै कुनै सरोकार पनि छैन
देशभक्ति के हो- उसलाई के थाहा
राष्ट्रियता के हो – ऊ के बुझोस्
यी कुराको उसलाई बोध हुनु
आवश्यक पनि छैन
चक्रबहादुरको आफ्नो कुनै देश छैन
चक्रबहादुरको आफ्नो कुनै भेष छैन
चक्रबहादुरको कुनै पहिचान छैन
कुनै परिचय छैन
जुन सरकारको सिन्दूर पहिरिन्छ चक्रबहादुर
उसकै निम्ति आफ्नो जीवन होमिदिन्छ चक्रबहादुर
बाँच्छ चक्रबहादुर अरु कै निम्तिर्
मर्छ चक्रबहादुर अरु कै निम्ति
आफ्नै लागि बाँच्न र
आफ्नै लागि मर्न
चक्रबहादुरले कहिले जानेन
शायद कहिले जान्ने पनि छैन
हो नेपाल चक्रबहादुर जन्माउँदै आएको छ
र नेपाल चक्रबहादुर जन्माउँदै जाने छ
विश्वमा जहाँ जहाँ युद्ध हुन्छ
चक्रबहादुर पुग्नु पर्दछ त्यहाँ त्यहाँ
हाजिर हुन
बन्दुक बोक्न
खुकुरी नचाउन
आयो गोर्खालीको संदेश दिन
चक्रबहादुर नपुगी युद्ध हुन्छ कहाँ
चक्रबहादुर नपुगी युद्ध चर्किन्छ कहाँ
चक्रबहादुर नपुगी युद्ध थामिन्छ कहाँ
बर्मा मलायाका जंगलमा पुगेन कि चक्रबहादुर
फ्रान्स इटलीका शहरमा पुगेन कि चक्रबहादुर
फाकलैण्ड श्रीलंका कहाँ पुगेन चक्रबहादुर
हो हर युद्धमा चक्रबहादुर लडिदिनु पर्दछ
हो, हर युद्धमा चक्रबहादुर मरिदिनु पर्दछ
चक्रबहादुर नभई कुनै युद्ध हुँदैन
चक्रबहादुर छ र युद्ध छ
युद्ध छ र चक्रबहादुर छ
चक्रबहादुर बिनाको युद्ध हुँदैन
युद्ध बिनाको चक्रबहादुर हुँदैन
युद्ध नै चक्रबहादुर हो
चक्रबहादुर नै युद्ध हो
चक्रबहादुर जित्छ र
कुनै देशको जीत हुन्छ
चक्रबहादुर हार्छ र
कुनै देशको हार हुन्छ
चक्रबहादुरले नजिती
कुनै देशले युद्ध जितेन
चक्रबहादुरले नहारी
कुनै देशले युद्ध हारेन
मित्रहरु
राइफल र खुकुरी भिरेर
तपाइंको मुलुकतिर बढिरहेको चक्रबहादुर
हाम्रो मित्रताको बाटोमा तगारो नबनोस्
चक्रबहादुरका कारणले
हाम्रो सम्बन्धमा कुनै गाँठो नपरोस्
तपाइंको मुलुकमा
चक्रबहादुरको उपस्थिति बिल्कुलै नखलोस्
तपाइं आफै सोंच्नुहोस्
बेचेको गोरुसित
गोसाहाको साइनोको के अर्थ
तपाइं चाहनुहुन्छ भने
चक्रबहादुर तपाइंको पनि हुन सक्छ
जुन चक्रबहादुर आज
तपाइंको खुँखार शत्रु भएर लडिरहेको छ
त्यही चक्रबहादुर भोलि
तपाइंको सहयोद्धा भएर पनि लड्न सक्छ
तपाइंको कमरेड इन आर्मस भएर पनि लड्न सक्छ
हामीलाई चक्रबहादुर हुनु र नहुनुको
कुनै अर्थ नभए पनि
तपाइंलाई चक्रबहादुर हुनु र नहुनुको
ठूलो अर्थ हुन सक्दछ ।