दामोदर पुडासैनी किशोर – जोर्डन
एउटा अँध्यारो डोम
सल्बलाउँदैछ छानामा
काकाकुल धरती
परेड खेल्दैछ हावासँग
च्यानलका बादल
नेटवर्कको खोजीमा छन्
मान्छेका अनुहार खोज्दैछ
आँधीबेहरीको एउटा जुलुस
डेट्सका रूखहरूले
काखमा सुकाउँदैछन्
आकाशलाई
आकाशमा
सुरूँग खन्ने योजना बुन्दैछन्
चराबाट बिच्केका मान्छेहरू
सँझना तिम्रो पनि छ
सँझना उनीहरूको पनि छ
सँझनानै सँझनाका कोसेली बेचेर
चित्र ब्यूँताउँदैछन
एक हुल कर्याँगकुरँग
लामको निर्माण
लामको विनिर्माण
लामनै लामका रेखाहरूमा
स्पन्दन लेखिंदैछ
तुवालोहरूमा
एउटा विशाल समुद्रलाई
भर्खरै पिएर रित्याइएको छ
समुद्रनै तीर्खाएर
अजिँगर नाच देखाइरहेछ
मौसम बिज्ञान बिभागको
भविष्यबाणी छ
आज दिनभर बदली हुनेछ
एउटी उदास प्रेमिका
मरूभूमिमा गुलाफ रोप्न थालेकी छ
मान्छेको चिच्याहट
छुरो बालुवा बनेर ब्युँतेको छ
२०७५ चैत्र २ शनिबार
अम्मान ,जोर्डन